Regular Update
एटीएम न्यूज नेटवर्क ः केंद्रीय मंत्रीमंडळाने सहकार क्षेत्रातील अन्नधान्य साठवण क्षमता ७०० लाख टन वाढविण्यासाठी १ लाख कोटी रुपयांच्या योजनेला मंजुरी दिली. सहकारी संस्थांतर्गत जगातील सर्वात मोठ्या अन्नधान्य साठवणूक योजनेसाठी सरकार धोरण आणणार आहे, अशी माहिती केंद्रीय माहिती व प्रसारण मंत्री अनुराग ठाकूर यांनी माध्यमांना दिली.
ठाकूर यांनी प्रस्तावित योजनेला सहकार क्षेत्रातील "जगातील सर्वात मोठा अन्नधान्य साठवणूक कार्यक्रम" असे संबोधले. या योजनेसाठी सरकार अंदाजे 1 लाख कोटी रुपयांची तरतूद करेल, असे त्यांनी सांगितले.
"पंतप्रधान नरेंद्र मोदी यांच्या अध्यक्षतेखाली केंद्रीय मंत्रीमंडळाने मंत्रालयाच्या विविध योजनांचे एकत्रीकरण करून "सहकार क्षेत्रातील जगातील सर्वात मोठी धान्य साठवणूक योजना" सुलभ करण्यासाठी आंतर मंत्रिस्तरीय समितीची स्थापना आणि सक्षमीकरणाला मंजुरी दिली.
या योजनेंतर्गत प्रत्येक ब्लॉकमध्ये 2000 टन क्षमतेचे एक गोदाम बांधण्यात येणार आहे. यासाठी आंतरमंत्रालय समिती स्थापन करण्यात येणार आहे.
देशातील अन्नधान्य साठवण सुविधांचा विस्तार करण्याच्या योजनेचा हा एक भाग आहे. यामुळे सहकार क्षेत्राला चालना मिळेल, असे ते म्हणाले.
सहकार क्षेत्रात भारताची अन्नधान्य साठवणूक क्षमता ७०० लाख टन वाढवण्याचे या कार्यक्रमाचे उद्दिष्ट आहे. सध्या देशातील धान्य साठवण क्षमता सुमारे 1,450 लाख टन आहे. पुढील पाच वर्षांत हा साठा 2,150 लाख टन इतका वाढेल. सहकार क्षेत्रातील साठवण क्षमता वाढवली जाईल, असे त्यांनी सांगितले.
ठाकूर म्हणाले की, साठवणुकीच्या अभावामुळे अन्नधान्याचे नुकसान कमी करणे, शेतकर्‍यांच्या त्रासदायक विक्रीवर नियंत्रण ठेवण्यास मदत करणे, आयात अवलंबित्व कमी करणे आणि ग्रामीण भारतात रोजगाराच्या संधी निर्माण करणे हे या उपक्रमाचे उद्दिष्ट आहे.
यामुळे भारतातील अन्नसुरक्षेला चालना मिळेल, शिवाय शेतकऱ्यांना त्यांच्या मालाची चांगली किंमत मिळण्यास मदत होईल. यापूर्वी, हवामानाशी संबंधित अस्पष्टतेमुळे शेतकऱ्यांना काही वेळा घाईघाईने माल विकावा लागत होता, असे ते म्हणाले.
भारतात 65,000 कृषी सहकारी संस्था आहेत. हे नवीन पाऊल कृषी सोसायट्या आणि शेतकरी तसेच ग्राहक या दोघांसाठीही फायद्याचे ठरेल. शेतकरी त्यांचे उत्पादन सुविधांमध्ये साठवण्याव्यतिरिक्त या सोसायट्यांकडून 70% पर्यंत कर्ज देखील मिळवू शकतील.
यामुळे वाहतूक खर्चात लक्षणीय बचत होईल. भारतात वर्षाला सुमारे ३,१०० लाख टन अन्नधान्याचे उत्पादन होते. देशातील सध्याच्या गोदामात केवळ ४७ टक्के उत्पादन साठवता येते, अशी माहितीही त्यांनी दिली.
